早上的老人科門診, 通常時間比較鬆動。接近一時正, 在我面前只剩下一個舊牌板。
「醫生, 好耐無見你喎。」一位 70多歲的女仕推門走進來。
「係呀, 之前去老人院呀嘛。」從四月回到老人科門診以來, 不少病友有此一問,我唯有逐一向他們解釋解釋。
「我有問啲姑娘呀, 佢地話你好忙呀。」
「都 ok 啦。你有無乜唔舒服呀?」
「呀醫生, 你幫我望吓塊面呢粒野有無問題? 」
「等我睇睇。」我腑身向前望望女仕的面脥。
「仲有呀, 呢排成日周身痛, 有無乜事㗎? 呢度有痺, 行路個時又有啲喘, 個身又輕飄飄咁。。。你睇吓我啲指甲? 有條白邊㗎, 有無事㗎?」女仕未待我檢查臉上的小痣, 已連珠炮發般向我申訴其它各樣問題。
「好!逐樣睇睇喎。」我一邊檢查, 一邊再問女仕的各種症狀; 症狀似乎都得不出一個診斷來。
望望上次診症紀錄, 上面寫着 multiple somatic complaints。。。同事覺得她的症狀並不是個身體病患。
我望一望女仕, 輕聲的問: 「你最近係唔係有啲唔開心? 」
女仕望着我, 猶豫了一會兒, 然後抬頭對着我説: 「你點知㗎, 我最近好唔開心。。。不過我唔係好想講, 一講起我又唔開心㗎。。。」
「可唔可以講俾我知, 睇吓我地有無野幫到你? 」了解情緒問題的因由, 才能作出幫助。
未待我説完, 女仕突然大哭起來。。。
「我呢年半三個親人走咗, 你話我點會開心。。。上年呀媽、今年到我老公、跟住家姐, 而家得番我一個係屋企。我個心成日揦住揦住, 諗起又喊。有時夜晚醒咗諗起佢地又不斷係度喊。有時係度諗, 都唔知日後點算好。。。」
摯親相繼離去, 剩下自己一人。望着家中充滿回憶的每個角落, 那份感慨那份無奈可以想像。聽着她的一字一句, 完全能感受到她的傷感。
「不如搵人同你傾吓計呀? 」我開腔作出建議。
「唔使啦。我覺一講我又喊。」很多情緒受到困擾的朋友, 都不願意跟人分享, 認為自己的事自己能夠解決。 他們可能不明白適當抒發感情是件好事。
「見吓啦, 傾吓計, 又睇吓我地有乜做到。」我再游說。
「唔使啦, 多謝你嘅好意呀醫生。」
生命無常, 如何面對生死, 的確是人生的大學問。
心理影響着生理, 情緒困擾往往帶來不同的身體症狀。作為醫生, 兩者都需要留意。
Search